Саха сиригэр коронавирустан утары ревакцинацияны биэс тыһ. кэриҥэ киһи ааста. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
«Бүгүҥҥү күҥҥэ ревакцинацияны 5 305 өрөспүүбүлүкэ олохтооҕо ааста. Бу ахсаан өссө үрдүөхтээх», — диэн иһитиннэриигэ этиллэр.
Ревакцинацияны алта ый анараа өттүгэр вакцина икки компоненнарын ылбыт дьон ааһыахтарын сөп.
Өрөспүүбүлүкэҕэ вакцина бастакы компоненын 326 318 киһи ылбыт, иккис компоненын 302 168 киһи ааспыт.
Үөһээ Халыма, Эдьигээн, Муома, Аллараа Халыма уонна Орто Халыма улуустара улахан дьоҥҥо вакцинаны ылыы былаанын 90 уонна 100%-н толордулар.
Ону тэҥэ Нам уонна Чурапчы улуустара былаан 60%-нтолорботохтор. Аммаҕа, Булуҥҥа, Үөһээ Бүлүүгэ, Кэбээйигэ, Нерюнгригэ, Уус Алдаҥҥа вакцинация былаана 65%-тан намыһах.
