Бүгүн, балаҕан ыйын 26 күнүгэр, көһө сылдьар «Кыайыы поезда» түмэл Мэҥэ Хаҥалас улууһун Аллараа Бэстээҕэр кэллэ.
«Бүгүн «Кыайыы поезда» аан бастакытын Саха сиригэр кэллэ. Биһиги Аллараа Бэстээххэ 03:50 чааска айаннаан кэлбиппит, үс күн устата сарсыарда 10:00 чаастан киэһэ 19:00 чааска диэри үлэлиэхпит», – диэн түмэл тэрийэр кэмитиэтин администратора Сергей Лукша эттэ.
Түмэл Аллараа Бэстээххэ балаҕан ыйын 26-28 күннэригэр үлэлиэҕэ. Балаҕан ыйын 29 күнүгэр Алдаҥҥа тиийиэҕэ, оттон балаҕан ыйын 30 күнүттэн алтынньы 2 күнүгэр диэри Нерюнгрига үлэлиирэ былааннанар.
«Кыайыы поезда» быыстапка-түмэл тимир суолларын вокзалларыгар туруоҕа. Араас тиэмэлэринэн арахсыбыт уон вагон устун Аҕа дойду Улуу сэриитин кэмнэриттэн көрүөххэ сөп.
