Ил Дархан Айсен Николаев Өлүөнэ өрүс тардыытын ууга салалтатын салайааччыта Петр Аргуновы кытта үлэ көрсүһүүтүн ыытта. Кэпсэтии сүрүн тиэмэтинэн өрөспүүбүлүкэ өрүстэригэр муус устуутун хаамыыта буолла.
Көрсүһүү кэмигэр Айсен Николаев муус устуутун уонна буолуон сөптөөх халааннар кутталларын аҕыйатарга бары интэриэстээх биэдэмэстибэлэр дьүөрэлэһиилээх үлэлэрин суолтатын бэлиэтээтэ.
«Муус устар уонна сааскы халаан кэмигэр өрөспүүбүлүкэ олохтоохторугар куттал суох буолуутун хааччыйыы – сүрүн соруктарбытыттан биирдэстэрэ буолар. Бары интэриэстээх биэдэмэстибэлэр чопчу бииргэ үлэлээһиннэрин уонна иһитиннэриилэринэн түргэнник атастаһыыны хааччыйар тоҕоостоох», — диэн Айсен Николаев эттэ.
Петр Аргунов өрөспүүбүлүкэ баһылыгар уу билиҥҥи балаһыанньатын, ону тэҥэ Өлүөнэ өрүс тардыытын ууга салалтата федеральнай уонна регионнааҕы структуралары кытта бииргэ сааскы халаан уутун куттала суохтук аһарарга ылынар миэрэлэрин туһунан иһитиннэрдэ. Ураты болҕомто экологическай кутталлаах гидротехническай тутуулар уонна эбийиэктэр халаан иннинээҕи чинчийиилэрин түмүктэригэр уурулунна.
Ону тэҥэ муус устар кэмигэр муус харыытын кутталын аҕыйатарга анаммыт халаан утары ыытыллыбыт үлэлэр эмиэ ырытылыннылар. Федеральнай уу ресурсаларын ааҕынстыбатын өйөбүлүнэн Өлүөхүмэ уонна Нам улуустарыгар Өлүөнэ өрүскэ, Орто Халыма улууһугар Халыма өрүскэ, ону тэҥэ Ньурба улууһугар Бүлүү өрүскэ үлэ кээмэйэ улаатта. Ол курдук, мууһу хараардыы үлэтин кээмэйэ 161 гектарынан улаатта.
Саха сиригэр 2026 сылга муус кытаанах буолуутун мөлтөтөр үлэлэр уопсайа 14 муниципальнай оройуоҥҥа ыытылыннылар. 92 муус харыан сөптөөх учаастакка 859 га мууһу хараардыы уонна 41 км мууһу кэрдии үлэтэ оҥоһулунна.
«Федеральнай уу ресурсаларын ааҕынстыбатыгар уонна Өлүөнэ өрүс тардыытын ууга салалтатын кэлэктиибигэр Саха сирин олохтоохторугар куттала суох буолууну хааччыйыыга дьүөрэлэһиилээх үлэҕит уонна эппиэтинэстээх сыһыаҥҥыт иһин махтанабын», — диэн Айсен Николаев бэлиэтээтэ.
Көрсүһүү түмүгүнэн муус устар уонна халаан кэмигэр бииргэ үлэлээһини уонна иһитиннэриилэринэн түргэнник атастаһыыны күүһүрдэр хардыылары чопчулаабыттар.
Хаартыска: Андрей Сорокин / СИА
