Ол курдук, өрөспүүбүлүкэҕэ бу күннэргэ эмискэ сылыйара күүтүллэр. Киин сирдэргэ салгын температурата +5 кыраадыска тиийэрэ сабаҕаланар. Күнү-дьылы кэтээн көрөөччүлэр маннык балаһыанньа муус устар ортотугар диэри турарын туһунан иһитиннэрэллэр.
«Сылаас күн-дьыл туруга өссө ааспыт нэдиэлэттэн саҕаланна — сүрүннээн соҕуруулуу-илин, соҕуруу уонна соҕуруулуу-арҕаа. Бу нэдиэлэҕэ сибиирдээҕи циклон дьайыытынан өрөспүүбүлүкэ арҕаа өттүгэр эрдэ буолбатах сылаас күннэр туруохтара. Дьокуускайга салгын температурата +5 кыраадыска тиийэрэ күүтүллэр. Билигин салгын температурата -8 кыраадыс буолуон сөбө, оттон билиҥҥи көрдөрүүнэн муус устар ортотугар туруохтаах күн-дьыл туруга бэлиэтэннэ»,-диэтэ Саха сиринээҕи күнү-дьылы кэтээн көрөр сулууспа метеорология уонна агрометеорология салаатын салайааччыта Саргылана Никитина.
Эксперт этэринэн, киин оройуоннарга бу нэдиэлэҕэ былыттаах күннэр туруохтара, оттон арҕаа хаардыыра күүтүллэр.
«Саха сиригэр бүттүүнүгэр сылаас күннэр туруохтара. Ол эрэн, быһа холоон, кулун тутар 31-тэн муус устар 1 күнүгэр диэри тымныйара сабаҕаланар», диэтэ Саргылана Никитина.
Хаартыска: Дмитрий Андреев
