Ил Дархан Айсен Николаев Саха сиригэр өссө алта киһи коронавирустаабыта билиннэ диэн брифинигэр эттэ.
«Санкт-Петербурга баар медицинскэй кииҥҥэ коронавирус инфекцията баар эбит. Онон тыһыынча курдук киһини хонтуруолга ыллыллар. Саха сирин олохтоохторо бу кииҥҥэ эмтэнэллэр. Кулун тутарга манна уонча киһи эмтэммит. Горнай улууһун кэргэнниилэрэ манна эмтэммиттэр. Бүлүүгэ ыалдьыбыт дьахтар эмиэ бу кииҥҥэ эмтэммит», — диэтэ Ил Дархан. Өссө икки ыалдьыбыт киһини Алдантан булбуттар. Кисловодскайтан кэлбит дьахтар кэргэнэ уонна Алдан ырыынагын дириэктэрэ.
Ону таһынан Ленскэйгэ «Газпром» вахтовай бөһүөлэгэр эмиэ инфекцияны булбуттар.
«Билиҥҥи туругунан учаастакка үс киһи коронавирустаабыта билиннэ, кинилэр Ленскэйгэ эмтэнэллэр. Өссө үс үлэһит уорбаланар. Миэстэтигэр быраастар тиийэн үлэлии сылдьаллар», — диэтэ Айсен Николаев. Дьокуускайга биир киһи коронавирустаабыт буолуон сөп. Бүгүн анаалыһа биллиэхтээх.
Муус устар 14 күнүнээҕи туругунан Саха сиригэр уопсайа 32 киһи ыалдьыбыта билиннэ. Олортон 19 киһи эмтэнэр, 13 киһи толору үтүөрбүтэ.
