Саха сиригэр коронавируска балаһыанньаны тута иһитиннэрэр, көрдөрөр «СтопКоронавирусЯкутия» сайт үлэтин саҕалаата. Манна суһал иһитиннэриилэр уонна ыарыы тарҕаныытын каартата баар. Ыалдьыбыттар дьиэлэрэ ыйылынна, икки нэдиэлэлээх самоизоляторга баар олохтоох дьон аадырыстара бэлиэтэннэ. «Кырдьыктаах информация биир сиргэ түмүллэрэ ордук суолталаах уонна хас биирдии киһиэхэ көдьүүстээх буолла», — диэтэ инновация, цифровой сайдыы уонна информационнай технология миниистирэ Анатолий Семенов. Бу сайт онлайн-сервистэргэ барыларыгар киирдэ. Рубрикатор нөҥүө медицинскэй, психологическай көмөнү ылыахха, онлайн-үөрэҕирии бары кыаҕын туһаныахха, аһы-үөлү уонна промышленнай табаары сакаастыахха сөп. Ону таһынан ыарыы сүрүн сибикилэрэ, ыалдьаары гыннаххына тугу гыныахтааҕыҥ ыйыллар.
«Тугу гынабыт?» чааһыгар кырдьаҕастарга, волонтердарга рекомендация бэрилиннэ, тэрилтэлэргэ, үлэ биэрээччилэргэ уонна үлэһиттэргэ көмө дьаһаллар ыйылыннылар. Ону таһынан чат-ботка ыйытыылары биэриэххэ сөп. Үлэлиир биэдэмистибэ суһал линияларын нүөмэрдэрин эмиэ билиэххэ сөп. Бу портал туһанааччыларыгар кырдьыктаах информацияны эрэ биэрэр.
