Ааспыт сууккаҕа уопсайа 41 974 гектар иэннээх сиргэ 5 ойуур баһаара умуруорулунна. Уот Мииринэй, Кэбээйи уонна Өлөөн улуустарыгар тохтотулунна. Бу туһунан брифиҥҥэ СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы, өрөспүүбүлүкэ кылаабынай лесничэйэ Андрей Коноплев иһитиннэрдэ.
Суукка саҕаланыыта 68 ойуур баһаара баара бэлиэтэнэр. 188 916 гектар уопсай иэннээх 10 ойуур баһаарын умуруоруу үлэлэрэ салҕаналлар. Уоту кытта охсуһууну Ньурба, Мииринэй, Өлөөн, Уус Маайа, Таатта уонна Орто Халыма улуустарыгар ыыталлар. Ойуур баһаардарын умуруорууга бүгүн 501 киһи уонна 57 тиэхиньикэ тардыллыбыт.
«Ээйик сэлиэнньэтигэр чугас баһаарга үлэлэр салҕаналлар. Онно 130 киһи, 12 анал тиэхиньикэ (вездеход) үлэлиир. Уоттуурга уонна харабыллыырга наадалаах бары үлэлэр ыытылыннылар. Сэлиэнньэҕэ куттал суох. Хаалбыт буруолуур сирдэри умуруоруу уонна харабыллааһын үлэлэрэ салгыы ыытыллаллар», — диэн Коноплев бэлиэтээтэ.
