Өрөспүүбүлүкэҕэ СВО 40-тан тахса кыттыылааҕа уонна кинилэр кэргэттэрэ массыына суоппарыгар идэлээх бэлэмнэнии бырагырааматын ороскуотун толуйууну (компенсация) ыллылар. Бу туһунан брифинҥэ СӨ Бырабыыталыстыбатын бэрэссэдээтэлин солбуйааччы Георгий Степанов иһитиннэрдэ.
«Саха сиригэр СВО кыттыылаахтарыгар уонна кинилэр дьиэ кэргэттэригэр аадырыстаах көмөнү оҥоруу үлэтэ салҕанар. 239 дьиэ кэргэҥҥэ олорор дьиэлэрин гаастааһыҥҥа материальнай көмө оҥоһулунна, 945 байыас төрөппүтэ санаторнай-курортнай эмтэниигэ көмө ылла. 679 киһиэхэ байыас эмтэнэр сиригэр тиийэригэр материальнай көмө оҥоһулунна, «Бэс Чагда» санаторийга СВО кыттыылаахтара уонна кинилэр дьиэ кэргэттэрэ 5079 социальнай уонна мэдиссиинэ реабилитациятын, доруобуйаны бөҕөргөтөр өҥөлөрү ыллылар. 683 киһи дьиэҕэ социальнай өҥөнү уонна полустационарнай көрүҥүнэн социальнай өҥөнү ылла», – диэн Георгий Степанов бэлиэтээтэ.
Кини иһитиннэриитинэн, дьону үлэҕэ киллэриигэ көмөнү 1342 киһи ылбыт, ол иһигэр 599 СВО кыттыылааҕа уонна кинилэр дьиэ кэргэттэриттэн 743 киһи киирбит. Кинилэртэн 257 киһи идэлээх үөрэххэ ыытыллыбыт, 808 киһи үлэҕэ киирбит.
Георгий Степанов үс сыл анараа өттүгэр, 2023 сыл муус устар 3 күнүгэр, Россия бэрэсидьиэнэ Владимир Путин «Аҕа дойдуну көмүскээччилэр» Судаарыстыбаннай пуонданы тэрийэр туһунан Ыйаахха илии баттаабытын санатта.
«Үс сыл устата дойдуга анал байыаннай дьайыы кыттыылаахтарын уонна кинилэр дьиэ кэргэттэрин социальнай өттүнэн арыаллыыр саҥа тиһик тэрилиннэ. Бүгүн Пуонда салаалара дойду бары субъектарыгар арылыннылар, онно 4500-тэн тахса социальнай координатор үлэлиир», – диэтэ вице-премьер.
Дьокуускайга судаарыстыбаннай пуонда салаатын Алексей Александров салайыылаах тэрийэн Саха сирэ салаалары бастакынан арыйбыт субъектэр ахсааннарыгар киирэр. Билиҥҥи туругунан өрөспүүбүлүкэ үрдүнэн 61 социальнай координатор үлэлиир, кинилэртэн 25-һэ – өрөспүүбүлүкэ киин куоратыгар. Социальнай координатордар истэригэр — СВО 2 бэтэрээнэ, СВО кыттыылаахтарын дьиэ кэргэттэрин 4 чилиэнэ баар.
Судаарыстыбаннай пуонда салаата үлэтин саҕалаабыт кэмиттэн 10 тыһыынчатан тахса киһи 40 тыһыынча кэриҥэ ыйытыыта киирбит, онтон 85 % ыйытыы быһаарыллыбыт, атын ыйытыылар үлэҕэ сылдьаллар.
Хаартыска: sakha.gov.ru
