Бүгүн, ыам ыйын 30 күнүгэр Дьокуускайга байыастары уонна кинилэр дьиэ кэргэттэрин өйүүр «Аҕа дойдуну көмүскээччилэр» судаарыстыбаннай пуонда филиала арылынна.
«Пуонда Ойуунускай аатынан уулуссаҕа турар. Онно социальнай координатордар, психологтар, психотерапевтар, элбэх өҥөнү оҥорор социальнай киин, библиотека, эмтэнэргэ аналлаах маллары прокаттыыр пуун үлэлиэҕэ. Байыастары уонна кинилэр дьиэ кэргэттэрин кытта 30 социальнай координатор үлэлиэҕэ, олортон 11-э — улуустарга. Сыл бүтүөр диэри координатор ахсаана 120-ҕэ диэри тиийиэҕэ. Кинилэр быыстарыгар социальнай үлэһиттэр, байыаннай дьайыы бэтэрээннэрэ, СВО кыттыылаахтарын дьиэ кэргэттэрэ бааллар», — диэн Ил Дархан Айсен Николаев телеграм-ханаалыгар суруйбут.
