Ил Дархан Айсен Николаев уонна өрөспүүбүлүкэ бырабыыталыстыбата анал байыаннай дьайыы кыттыылаахтарын оҕолорун өйүүр миэрэлэргэ сүрүн болҕомто уураллар. Ол курдук, кинилэргэ оҕо лааҕырдарыгар босхо сынньалаҥ биэрэллэр. Бүгүҥҥү күҥҥэ 3000 сайаапка киирдэ.
«Дьокуускайга «Сосновый бор» уонна Сунтаар улууһугар «Сир уустара» лааҕырдарга босхо сынньалаҥ биэрэллэр. Уопсайа 1000-тан тахса оҕо лааҕырдарга сынньаныаҕа», – диэн «Сосновый бор» киин дириэктэрэ Яна Иванова брифиҥҥэ эттэ.
Ону таһынан, кини бэлиэтииринэн, билиҥҥи кэмҥэ Хара уонна Дьоппуон байҕаллар лааҕырдарыгар сынньалаҥ бэриллэригэр үлэ бара турар.
Сайабылыанньалары төрөппүттэртэн, сокуоннай бэрэстэбиитэллэртэн «Мин докумуоннарым» кииҥҥэ туталлар. Ону таһынан «Госуслуга» эбэтэр кылаас салайааччытын, оскуола дириэктэрин нөҥүө эмиэ биэрэххэ сөп.
