Өрөспүүбүлүкэҕэ «Баһаартан сэрэхтээх буол – АДПИ туруор!» социальнай аахсыйа чэрчитинэн, 2023 сылга дьиэ кэргэттэргэ түөрт тыһыынчаттан тахса автономнай баһаары сэрэтэр тэрил туруордулар. Бу аахсыйа номнуо иккис сылын салҕанар.
СӨ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар министиэристибэ иһитиннэрэринэн, 2023 сыл устата аахсыйаҕа уопсайа 1314 киһи кыттыыны ылла. Саха сиринээҕи судаарыстыбаннай баһаары утары үлэлиир сулууспа эмиэ кытынна. Ол үлэ түмүгэр 4091 дьиэҕэ 4605 АДПИ туруорулунна.
Аахсыйаҕа баҕа өттүнэн ким баҕарар кыттыан сөп. Оччотугар кыттааччы баһаары сэрэтэр тэрили ылар уонна бэйэтин чугас дьонугар, доҕотторугар, элбэх оҕолордоох ыалларга туруоран биэрэр.
АДПИ-ны баһаар тэрилин атыылыыр анал маҕаһыыннарга булуохха сөп. Кини буруо таҕыстаҕына тыас таһаарар, онон элбэх дьону быыһаабыт тэрил буолар.
