Сэтинньи 25-26 күннэригэр РФ инновацияҕа, цифровой сайдыыга уонна инфокоммуникационнай технологияҕа министиэристибэтэ СӨ бырабыыталыстыбатын кытта «Цифровой алмаз» форуму тэрийиэҕэ.
Тэрээһиҥҥэ регион баһылыктара уонна федеральнай, региональнай былаас уорганнарын бэрэстэбиитэллэрэ, IT-хампаанньалар салайааччылара кыттыахтара.
Кинилэр ис бэлиитикэҕэ быһыы-майгы уустугурбутуттан үөскээбит боппуруостары ырытыахтара, маны тэҥэ Россия бастыҥ технологическай держава быһыытынан сайдар төрүөттэрин көрүөхтэрэ.
Планернай мунньах форума цифровой суверенитекка ананыаҕа. Манна РФ инновацияҕа, цифровой сайдыыга уонна инфокоммуникационнай технологияҕа министиэристибэтин баһылыга Максут Шадаев, Саха сирин Ил Дархана Айсен Николаев уонна Россия IT-салааларын салайааччылара кыттыыны ылыахтара.
Медиа, киинэ уонна анимация бастыҥ экспердэрэ региоҥҥа оҥорон таһаарыы миэрэлэрин уонна дойду онлайн-киинэ тыйаатырдарын үлэлэрин ырытыахтара.
Ону таһынан, дойду оҥорон таһаарааччылара уонна инвестордар гейм-индустрия финансовай бырайыактарын уонна каадырдары көрдүүргэ көстөр кыһалҕалары ырытыахтара.
Форум хаамыытынан «HACK-the-ICE 4.0» оҥорон таһаарааччылар Уһук Илиҥҥи марафоннара ыытыллар. Манна «Арктической стартап-экспедиции» анимационнай бырайыак уонна «B8» акселерационнай бырагыраама чэрчитинэн спортивнай бырагыраамаҕа, сүрэхтэнии РФ аһаҕас чемпионатын сүүмэрдиир оонньуулара ыытыллыахтара.
Быыстапкаҕа дойду тэриллэригэр уонна бырагырааманан хааччыйыыга Саха сирин хампаанньаларын IT-бырайыактарыгар анаммыт туспа былаһааккалар үлэлиэхтэрэ.
Сиһилии бырагырааманы уонна бэлиэтэниини форум сайтыгар киирэн көрүөхүтүн сөп.
