Россия бэрэсидьиэнэ Владимир Путин туһаайыытынан коронавирус тарҕаныытынан олохтоммут уустук балаһыанньа кэмиҥэр, үһүгэр диэри саастаах оҕолорго көрүллэр 5000 солкуобай кээмэйдээх эбии социальнай көмө төлөбүрү Саха сирин 20 000 тахса дьиэ кэргэнэ ылла.
Ыам ыйын 14 күнүн туругунан социальнай көмөнү өрөспүүбүлүкэ ийэ хапытаалын ылар бырааптаах 20 335 дьиэ кэргэнэ ылла.
«Билигин ийэ хапытаалын ылар бырааба суох дьиэ кэргэттэртэн маннык көмөнү ылыыга сайабылыанньа тутабыт. Сотору кэминэн бэриллии бырагыраамата оҥоһуллуоҕа», — диэн өрөспүүбүлүкэтээҕи биэнсийэ пуондатын социальнай төлөбрүрдэргэ салаатын салайааччыта Сардаана Ефимова кэпсээтэ.
Төлөбүр хас биирдии үһүгэр диэри саастаах оҕоҕо муус ыйыттан бэс ыйыгар диэри үс ый устата оҥоһуллуоҕа. Сайабылыанньаны судаарыстыбаннай өҥө порталын уонна биэнсийэ пуондатын сайтын «Ийэ (дьиэ кэргэн) хапытаала» балаһа нөҥүө биэриэххэ сөп.
