Саха сирин хас онус балыыһата хаарбах, эбэтэр көтүрүллэр туруктааҕынан ааҕыллар, 330 тутуу хапытаалынай өрөмүөнү ирдиир. Бу туһунан Ил Дархан Айсен Николаев Ил Түмэҥҥэ үгэс буолбут Анал этиитин кэмигэр эттэ.
«Анал оборуудабанньа эргэриитэ 70-80 %-ҥа тэҥнэһэр. Өрөспүүбүлүкэ дьаһалтата тус болҕомтотун доруобуйа харыстабылын эйгэтин маҥнайгы сүһүөҕэр: материальнай базаны уонна кадырдарынан хааччыйыыга уурар», — диэн Ил Дархан бэлиэтээтэ.
Дьокуускайга 4,1 миллиард солкуобай суумалаах судаарыстыбаннай үбүлээһиннээх сүрэх-хаан ыарыыларын эмтиир киин тутулла турарын. Ону тэҥэ онкология киинин туттуллуутугар дойду хааһынатыттан 5,9 миллиард солкуобай көрүллүбүтүн туһунан санатта.
«Искэн ыарыытын утары охсуһуу»диэн өрөспүүбүлүкэтээҕи бырагыраама чэрчитинэн, Саха сиригэр искэн утары охсуһар тоҕус амбулаторнай көмө киинэ Дьокуускайга, Алдаҥҥа, Мэҥэ Хаҥаласка, Ньурбаҕа, Нерюнгрига уонна Мииринэйгэ аһылынна», — диэн Айсен Николаев эттэ.
Ил Дархан этэринэн, өрөспүүбүлүкэ дьаһалтатын сүрүн сыалынан — нэһилиэнньэ чөл доруобуйалаах, үөрэхтээх уонна култуурунай сайдыылаах буоларыгар, аныгылыы социальнай инфраструктуураны сайыннарыы ирдэнэр.
