Өрөспүүбүлүкэҕэ коронавируһу утары нэһилиэнньэ 54% улахан дьоно быһыыны ылла. Бу туһунан өрөспүүбүлүкэтээҕи суһал штаб салайааччытын солбуйааччы Ольга Балабкина брифинг кэмигэр иһитиннэрдэ.
«Уопсайа өрөспүүбүлүкэҕэ нэһилиэнньэ 54% улахан дьоно быһыы бастакы компоненын ылла. Ол аата 389 013 киһи», – диэтэ кини.
Суһал штаб иһитиннэриитинэн, бүгүҥҥү күҥҥэ Дьокуускайга нэһилиэнньэ 55,61% улахан дьоно быһыыны ылбыт. Киин улуустарга Хаҥалас бастыҥ көрдөрүүлээх, 55,15% киһи вакцинацияны ааспыт. Уус Алдан, Чурапчы, Нам мөлтөх көрдөрүүлээхтэр. Соҕуруулуу-арҕаа улуустарга Ленскэй бастакы сылдьар, 60,22% киһи быһыы ылбыт, оттон салгыы Нерюнгри, Үөһээ Бүлүү уонна Миирнэй иһэллэр. Илин улуустарга Уус Майа — 62,03%, Өймөкөөн — 61,60%, Томпо — 53,80%.
Ольга Балабкина грипп утары вакцинация хампаанньатын күүһүрдэргэ соруйда.
«Билигин өрөспүүбүлүкэ 183 тыһ. киһи грипп утары быһыы ылбыт. Нэһилиэнньэ 19% дьоно. Өрөспүүбүлүкэҕэ билигин грипп вируһа бэлиэтэммит. Грипп уонна коронавирус холбостохторуна ыарахаттары үөскэтиэн сөп. Ол иһин грипп утары быһыыны ылыахха наада», – диэн өрөспүүбүлүкэтээҕи суһал штаб салайааччытын солбуйааччы бэлиэтээтэ.
