Саха сиригэр региоҥҥа стратегическай суолталаах, алмаас хостуур салааҕа оҥоһуу өйү киллэрэр бырайыак саҕаланна. «Алмазы Анабара» АУо (АЛРОСА бөлөҕө) көмпүүтэрнэй көрүү көмөтүнэн ураты бөдөҥ алмаастары көрдүүр көҕүлээһини олоххо киллэриини саҕалаата.
Бырайыак «Алмазы Анабара» оҥорон таһаарар базатыгар, «Алроса ИТ» уонна Саха Өрөспүүбүлүкэтин Оҥоһуу өйүн лабораториятын кытары бииргэ ыытыллар. Кини хостуур үлэ эппиэгин үрдэтэргэ уонна Саха сирин бу сүрүн салааҕа технология лиидэрин быһыытынан бөҕөргөтөргө аналлаах аныгы сыыппара быһаарыылары оҥорууга туһаайыллар.
Бу оҥоһуу төрдүгэр — видеопотогу буола турар түгэҥҥэ ырытар массыынанан үөрэтии модела сытар. Систиэмэ нейроситим көмөтүнэн эбийиэктэри сегментациялыыр уонна сырье уопсай сүүрээнигэр сыаннастаах алмаастары көмпүүтэрнэй көрүү алгоритмнарын туттан булар.
Технологияны тургутуу сотору кэминэн фабрикаҕа ыытыллыаҕа, онно оҥоһуу өй ураты бөдөҥ алмаастар имитацияларын булууга үрдүк таба булууну көрдөрүөхтээх. Бу алгоритмнары тупсарыыга уонна систиэмэни бырамыысыланнаска киллэриигэ бэлэмнииргэ көмөлөһүөҕэ.
Бырайыак АЛРОСА хампаанньаттан бигэргэтиини номнуо ылла уонна Саха сирин Инновацияны сайыннарар пуондатын Инновацияҕа сэбиэтинэн өйөннө, бу регион экэниэмикэтигэр кини стратегическай суолтатын бэлиэтиир.
Көҕүлээһин үс түһүмэҕинэн олоххо киирэр: бастакы түһүмэх 2025 сыл бүтүүтэ түмүктэммитэ, иккис түһүмэх 2026 сылга ыытыллар, оттон бырайыак түмүгүн таһаарыы 2026 сыл бүтүүтүгэр былааннанар.
«Саха сирэ үгэс быһыытынан алмааһы хостооһуҥҥа аан дойду киинэ буолар, оттон бүгүҥҥү күҥҥэ биһиги сорукпут — региоҥҥа лиидэр статуһун сыыппара технологияларын эйгэтигэр эмиэ бөҕөргөтүү. Оҥоһуу өйү оҥорон таһаарыы процесстарыгар киллэрии — бу эппиэги үрдэтии эрэ буолбатах, бу бырамыысыланнас саҥа моделыгар хаачыстыбалаах көһүү буолар. Биһиги саха компетенциятын базатыгар аан дойду таһымыгар күрэхтэһэр кыахтаах быһаарыылар оҥоһуллалларын көрөбүт, уонна маннык бырайыактар өрөспүүбүлүкэ инновационнай экосистематын барытын сайыннарыа диэн эрэнэбит», — диэн СӨ Инновация, сыыппара сайдыытын уонна иһитиннэрии-ситим технологияларын миниистирэ Петр Николаев бэлиэтээтэ.
Хаартыска: оҥоһуу өй
