Бүтэһик 10 сылга, 2024 сылы ааҕан көрдөххө, Саха Өрөспүүбүлүкэтин уонна кини оройуоннарын бүддьүөтүгэр АЛРОСА тэрилтэлэрэ налоговай уонна неналоговай төлөбүрдэр быһыытынан 631 млрд солк ыыппыттар. Бу өрөспүүбүлүкэ консолидированнай бүддьүөтүн дохуотун 35%-на буолар. Бу туһунан АЛРОСА кэтиир сэбиэтин стратегияҕа уонна тирэхтээх сайдыыга кэмитиэтин мунньаҕар иһитиннэрдилэр.
2015-2024 сылларга Саха сирин бүддьүөтүгэр АЛРОСА-ттан киирбит налоговай үп 435 млрд солкуобайга тэҥнэстэ. Нолуок улахан аҥаара сиртэн хостонор баайтан, киирбит дохуоттан, сир аннынааҕы баайы хостооһунтан кэллэ.
Неналоговай төлөбүр 195,8 млрд солкуобайга тэҥнэстэ, ол иһигэр дивиденд быһыытынан 152,6 млрд солк. АЛРОСА акционера буолар аҕыс муниципальнай тэриллии бүддьүөтүгэр 23% дивидени ол эбэтэр 35,8 млрд солкуобайы ыыппыттар.
«Саха сирин экономикатыгар инники күөҥҥэ сылдьар уонна сүрүн нолуок төлөөччү буолар. Бүтэһик уон сыл иһигэр өрөспүүбүлүкэ бүддьүөтүн ортотунан 35%-на биһиги дохуоппутуттан турар. Хампаанньаттан киирбит нолуоктарынан, дивиденнэринэн өрөспүүбүлүкэ бүддьүөт үлэһиттэрин хамнастарын төлүүр, балыыһалары, култуура дьиэлэрин, оскуолалары уонна уһуйааннары тутар, хааччыйар, суоллары өрөмүөннүүр уонна да атын өҥөлөрү оҥорор. Ону таһынан, хампаанньа социальнай ороскуота 10 сыл иһигэр 78 млрд солк-тан тахсар. АЛРОСА үлэҕэ табыгастаах усулуобуйаны тэрийэри таһынан Саха сирин оройуоннарыгар тус сыаллаах көмөнү оҥорор — социальнай эбийиэктэри тутар, саҥардар, саха дьонун олоҕор тыын суолталаах бырайыактары өйүүр, өрөспүүбүлүкэҕэ буолар улахан спортивнай күрэхтэһиилэри уонна култуурунай тэрээһиннэри үбүлүүр», – диэн Саха сирин Ил Дархана Айсен Николаев эттэ.
Саха сирэ — АЛРОСА биир сүрүн акционера буолар. Киниэхэ 33%-наах аахсыйата сытар, ол иһигэр 25%-на өрөспүүбүлүкэ бырабыыталыстыбатыгар, эбии 8%-на тэҥ кээмэйинэн аҕыс улууска баар.
