Саха сирин Тумул, Ойууһут уонна Маар сэлиэнньэлэригэр сууккаҕа 258 тонна ууну бырахтылар. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.
Авиалесоохрана суһал иһитиннэриитинэн, Саха сиригэр уопсайа 13 тыһ. тахса гектар иэннээх сиргэ 32 ойуур баһаара баара бэлиэтэнэр.
Нэһилиэнньэлээх пууннары баһаартан харыстыыр бары дьаһаллар толоруллубуттара бэлиэтэнэр.
Ону тэҥэ судаарыстыбаннай баһаартан сэрэхтээх буолуу сулууспатын уонна өрөспүүбүлүкэ быыһааччыларын күүстэринэн Үөдэй, Ньурбачаан, Хаандыга, Хоро, Далыр, Ынахсыт нэһилиэнньэлээх пууннарыгар уонна Ууродан диэн сиргэ куттал суох буолуутун постара туруорулуннулар.
Ону таһынан сэлиэнньэлэр кытыыларынан минерализированнай балаһалары тэрийэр уонна кэҥэтэр үлэни ыыттылар. Саха сиригэр нэһилиэнньэлээх пууннарга уот киириитэ суох.
Эрдэ этиллибитин курдук, Хаандыга бөһүөлэгиттэн чугас 150 гектар иэннээх ойуур баһаара баар.
Билигин ойуур баһаардарын умуруорууга Лесоохрана анал чаастара үлэлииллэр, онно куттал суох буолуутун постара туруорулуннулар. Мэҥэ Алдан, Чурапчы уонна Таатта сэлиэнньэлэриттэн эбии күүһү ыыттылар.
