Бүгүн үгэс буолбут «Grand Final. Чемпионы Якутии» бириэмийэни туттардылар. Кыайыылаахтары бырабыыталыстыба бэрэссэдээтэлин солбуйааччы Сергей Местников эҕэрдэлээтэ.
«Саха сирин олохтоохторо спордунан утумнаахтык дьарыктанар буоллулар. Ону сыыппаралар да туоһулууллар, быйыл нэһилиэнньэ 46%-на спордунан дьарыктанна. 2024 сылга өссө элбэтэр былааннаахпыт. Онуоха оройуоннарга улахан спорт комплекстара тутуллан, усулуобуйа тэриллэр. Ааһан эрэр сылга улахан күрэхтэһиилэргэ спортсменнарбыт 92 мэтээли ыллылар, 68-а кыһыл көмүс», – диэбит вице-премьер.
2021 сылга юниордарга олимпийскай спорт көрүҥэр бастыҥынан Станислав Свинобоев ааттанна, тренерэ — Василий Уваров. Бу номинацияҕа дьахталларга сүүрүүк Сардана Трофимова кыайда, тренер – Татьяна Жиркова, эр дьоҥҥо – тустуук Арыйаан Тютрин, тренер – Иван Дмитриев.
«Спортка сулууспатын иһин» бириэмийэнэн экстремал-сүүрүүк Дмитрий Горохов наҕараадаланна. «Сыл мецената» – мас тардыһыыга дойду хомуур хамаандатын чилиэнэ Петр Бурнашев уонна Үөһээ Бүлүүгэ спортины сайыннарыыга киини туттарбыт Николай Еттянов.
Бастыҥ уопсастыбаннай тэриллиинэн кикбоксинг федерацията буолла, кикбоксердар 34 кыһыл көмүс, 38 үрүҥ көмүс уонна 52 боруонса мэтээллээхтэр.
«Олимпийскайа суох көрүҥнэргэ бастыҥ спортсменынан» юниордарга шашист Альбина Большакова, дьахталларга гроссмейстер Матрена Ноговицына, тренер – Николай Кычкин, эр дьоҥҥо – боксер Петр Васильев ааттаннылар.
Сортивнай оройуонунан Горнайы ааттаатылар. ГТО-ҕа бастыҥ тэрийээччи – Виталий Загашеев. Адаптивнай көрүҥнэргэ бастыҥ спортсменынан юниордарга пауэрлифтер Айаал Сивцев, дьахталларга – Токиоҕа буолбут Паралимпиадаҕа боруонса призер Степанида Артахинова, эр дьоҥҥо – армрлестлер Сергей Безносов ааттаннылар.
Бастыҥ спортивнай тэрийээччинэн Максим Оегостуровы, бастыҥ спортивнай суруналыыһынан Александр Посельскайы быһаардылар.
Ону таһынан дьүүллүүр сүбэ уонна норуот национальнай көрүҥнэргэ бастыҥнары быһаардылар — мас тардыһааччылар Фаина Дмитриева, Наталья Черноградская, Сергей Фролкин кыайдылар.
Бастыҥ судьуйанан Горнай спортивнай оскуолатын хотугу многоборьеҕа тренерэ Иван Горохов, бастыҥ тренеринэн дзюдоҕа кылаабынай тренер Дамдинджорж Гомбодорж ааттаннылар.
Көрөччүлэр биһирэбиллэрин ыстаҥаһыт Кай Адамов ылла. Сыл бастыҥ түгэнинэн Степанида Артахинова Паралимпиалаҕа ситиһиитин ааттаатылар.
