Икки бүтэһик ый устата Аҕа дойду көмүскээччилэрин дьиэ кэргэттэрин кэмитиэтин «Правмобиль» диэн бырайыага биэс улууска тахса сырытта.
Быраапка көмөнү анал байыаннай дьайыы кыттыылаахтарын 147 дьиэ кэргэнэ ылла. Бу туһунан брифиҥҥэ Аҕа дойду көмүскээччилэрин дьиэ кэргэттэрин кэмитиэтин Саха сиринээҕи салаатын салайааччытын солбуйааччы Альбина Винокурова иһитиннэрдэ.
«Таатта, Мэҥэ Хаҥалас, Нам, Уус Алдан, Орто Халыма улуустарыгар «Правмобиль» сылдьыбыт кэмигэр СВО кыттыылаахтарын дьиэ кэргэттэриттэн 228 ыйытыы киирбитэ. Быраап туһунан быһаарар консультациялары өрөспүүбүлүкэ министиэристибэлэрэ уонна сулууспалара, улуус дьаһалтатын бэрэстэбиитэллэрэ, военкомат үлэһиттэрэ, Саха сиригэр киһи быраабыгар боломуочуйалаах ыыттылар. Улуустарга тахсыылары Ил Дархан уонна Бырабыыталыстыба дьаһалтатын өйөбүлүнэн тэрийдилэр», – диэн спикер эттэ.
Альбина Винокурова бэлиэтииринэн, улуустарга «Правмобиль» үлэтэ нэһилиэнньэ быраапка босхо көмөҕө улаханнык наадыйарын көрдөрдө. Кэлин атын улуустарга тахсан үлэлииргэ Россия оборуонаҕа министиэристибэтин уонна борокуратууратын, федеральнай биэдэмэстибэлэр уонна сулууспалар бэрэстэбиитэллэрин кытыннарар былааннанар.
Аҕа дойду көмүскээччилэрин дьиэ кэргэттэрин кэмитиэтэ 2022 сыл ахсынньытыгар бэрэсидьиэн Владимир Путин көҕүлээһининэн арыллыбыта. Кэмитиэт Саха сиринээҕи салаата 2023 сыл тохсунньутугар «Биир Ньыгыл Россия» баартыйа Саха сиринээҕи салаатын сэкирэтээрэ, Ил Дархан Айсен Николаев өйөбүлүнэн үлэтин саҕалаабыта. Штаб салайааччытынан үс байыас ийэтэ Марина Бахилина буолар.
Хаартыска: sakha.gov.ru
