Фея диэн ыҥырар ааттаах медик анал байыаннай дьайыы балаһатыгар бааһырбыт байыастары эмтии барда.
Бу туһунан байыаннай кэрэспэдьиэн Николай Борисов иһитиннэрдэ.
«Мин терапевт уонна кардиолог быһыытынан бардым. Биһиги байыастарбыт эмтэнэр госпиталларыгар үлэлиибин. Эчэйииттэн таһынан атын ыарыылары эмиэ эмтиибин. Биһиги хирурдарга көмөлөһөбүт. Хирурдар эпэрээссийэлииллэр, реабилитацияҕа үлэлэһэллэр. Оттон терапевтар уолаттарбыт туруктарын көрөбүт-истэбит, эмтиибит, чөлгө түһэллэригэр өйөбүл буолабыт», — диэн быраас кэпсээтэ.
Фея СВО-ҕа барар быһаарыныытын туһунан чугас дьонноругар эппит. Бастатан туран аҕата, кэргэнэ уонна оҕолоро билбиттэр.
«Аан бастаан соһуйбуттара. Кэргэним олус диэн долгуйбута. Ол эрээри кини мин майгыбын бэркэ диэн билэр. Тугу эрэ быһаарыммыт буоллахпына санаабын уларытар ыарахан. Бу мин өр толкуйдаан ылыммыт баҕам буолар. Оннук диэн быһаардахпына үгүс дьон өйдүүр. Кэллиэгэлэрим уонна салалтам эмиэ өйдөөбүттэрэ», — диэн Фея эттэ.
Быраас бэлиэтииринэн, кинини кытта госпиталга Россия бары регионнарын быраастара үлэлииллэр-хамсыыллар.
«Биһиги доҕордоһоммут өрөбүллэрбитин бииргэ атаарары былаанныбыт. Маннааҕы үлэм уратылардаах эрээри балыыһа үлэтиттэн оннук атына суох», — диэн кини эттэ.
Фея икки эһээтэ Аҕа дойду Улуу сэриитин кыттыылаахтара. Биир эһээтэ Карельскайдааҕы фроҥҥа хайыһардаах десаҥҥа связиһынан сулууспалаабыт.
«Хайыһардаах туран хаарга утуйалларын кэпсиир этэ. Өстөөх хараҕар көстүбэт курдук маҥан таҥаһы кэтэр этилэр. Иккис эһээм Ворошиловскай фроҥҥа сырдык тыына быстыбыта. Өлүөн иннинээҕи күн ыыппыт суруга биһиэхэ баар», — диэн Фея эттэ.
«Биһиги бары дойдубут патриоттара буолабыт. Хас биирдиибит эйэлээх халлаан баар буоларын баҕарар. Анал байыаннай дьайыы саҕаламмытыгар мин медицинэ үлэһиттэрэ наада буолуохтара диэн санаабытын. Бэйэм харахпынан туох буола турарын көрүөхпүн баҕарар этим. Бэйэн эрэ көрдөххүнэ санаан-оноон уларыйар, туохха барытыгар атын, ураты сыһыаннаах буолаҕын», — диэн Фея санаатынан үллэһиннэ.
Хаартыска: Николай Борисов
