Бэс ыйын 11 күнүгэр икки түһүмэҕинэн ыытыллыбыт 2021 сыллааҕы бэрэсидьиэн граннарыгар куонкурус түмүктэннэ. Уопсайа Бэрэсидьиэн гранын пуондата 2144 бырайыагы өйөөтө. Онтон өрөспүүбүлүкэттэн 218 сайаапкаттан 32-тэ кыайыылааҕынан таҕыста. Уопсайа өрөспүүбүлүкэ бырайыактарыгар 22 258 585,00 солк. суумалаах үбүлээһин көрүлүннэ. Ааспыт сылы кытта тэҥнээтэххэ, 2020 сыл иккис түһүмэҕэр бырайыак ахсаана 78-нан элбээн биэрдэ. Уһук Илин уокурук иккис куонкуруһугар 748 сайаапка киирдэ, онтон 117 өйөбүлү ылла. Бэйэтин уокуругар Саха сирэ бастаан таҕыста.
Үбүлээһин сууматын ахсаанынан өрөспүүбүлүкэ Хабаровскай кыраай кэнниттэн иккис миэстэҕэ таҕыста. (21 сайаапка суумата — 29 260 743,49 солк.). Үһүс миэстэ — Забайкальскай кыраай: 15 сайаапкаҕа 19 015 812,62 солк. Муниципальнай оройуоннарынан холобурдаатахха, пуондаттан өйөбүлү 14 муниципальнай оройуон ылла: Кэбээйи – 3, Уус Алдан уонна Хаҥалас — иккилии бырайыак, Амма, Горнай, Дьааҥы, Үөһээ Бүлүү, Таатта, Чурапчы — биирдии бырайыак.
Сайаапкалар уон хайысханан өйөннүлэр. Онтон маннык хайысхаларга ордук элбэх бырайыак: доруобуйа харыстабылыгар, чөл олоххо — аҕыс; наука, үөрэхтээһин — алта; култуура уонна ускуустуба — түөрт; айылҕа, тулалыыр эйгэ уонна кыыл-сүөл харыстабыла; социальнай хааччыйыы уонна өйөбүл — үс; дьиэ кэргэн өйөбүлэ, устуоруйа өйдөбүнньүгэ уонна норуоттар бэйэ бэйэлэрин өйөһүүлэрэ — икки; ыччаты, уопсастыбаннай түмсүүлэри өйөөһүн — биирдии бырайыак. «Дьокуускай куорат» уокуруга — 16 бырайыак.
Уопсайа бастакы уонна иккис түһүмэххэ быйылгы сылга Бэрэсидьиэн гранын пуондатыттан Саха сириттэн 64 бырайыак 62 308 407,6 солк. суумаҕа көмүскэннэ. Кыайыылаахтары истиҥник эҕэрдэлиибит! Бырайыактаргыт түмүктээх буоллуннар!
