Ыам ыйын 23 күнүттэн 25 күнүгэр диэри Благовещенскай куоракка «АмурЭкспо-2025» россиятааҕы-кытайдааҕы экономическай форум ыытыллар. Форум Уһук Илиҥҥэ биир сүрүн дьыалабыай тэрээһин буолар.
Форумҥа Саха сирин Уһук Илиҥҥи Уокурукка СӨ бастайааннай бэрэстэбиитэлэ Ким Борисов салайыытынан дэлэгээссийэ көрдөрөр. Дэлэгээссийэ састаабыгар Алдан оройуонун уонна Саха сирин тимир суолларын бэрэстэбиитэллэрэ киирдилэр.
Уопсастыбаннай-култуурунай киин уулуссатааҕы быыстапкатын былаһааккатыгар баар экспозицияҕа Саха сирэ киин миэстэҕэ турар.
Ол курдук, Саха сирин маастардара сэлии муоһуттан өйдөбүнньүктэри, национальнай оҥоһуктары, киэргэллэри көрдөрдүлэр. Илиҥҥи экономическай форумҥа уонна Харбин дьаарбаҥкатыгар үрдүктүк сыаналаммыт экспонаттар Кытай дэлэгээссийэтин, кэлбит дьон кэрэхсэбилин ыллылар.
Дьыалабыай бырагыраама иитинэн Ким Борисов пленарнай сессияҕа «Республика Саха (Якутия) и провинции Китайской Народной Республики: новые горизонты регионального сотрудничества» диэн дакылааты аахта, Кытай регионнарын уонна Саха сирин оройуоннарын икки ардыларынааҕы доҕордоһуу сыһыаннарын кэпсээтэ, ону тэҥэ экономикаҕа, култуураҕа, туризмҥа сүрүн хайысхалары ыйда.
Росконгресс фонда өйөбүлүнэн ыытыллар россиятааҕы-кытайдааҕы экономическай форум «АмурЭкспо-2025» Илиҥҥи экономическай форум былаһаакката буолар. Тиэмэтэ — глобальнай уонна регионнааҕы экономика интэриэһигэр судаарыстыбалар икки ардыларынааҕы сыһыаны бөҕөргөтүү.
