Саха Өрөспүүбүлүкэтин сүүмэрдиир хамаандатын дзюдоистара 21-гэр диэри саастаах эдэрдэргэ Уһук Илиҥҥэ бастыыр иһин күрэххэ икки кыһыл көмүс, иккилии үрүҥ көмүс уонна боруонса мэтээллэри ыллылар. Күрэхтэһии алтынньы 11 күнүгэр Владивосток куоракка ыытыллыбыта. Бу туһунан «Триумф» спорт киинэ иһитиннэрэр.
Кыргыттарга 48 киилэҕэ диэри ыйааһыҥҥа финалга Саха сирин спортсменнара кииристилэр. Түмүккэ Виктория Матаркина кыайыылааҕынан таҕыста, Диана Вихарева үрүҥ көмүс мэтээли ылары ситистэ. Финалга диэри кинилэр Приморскай, Хабаровскай кыраайдар уонна Бурятия кыргыттарын хоппуттара.
Өссө биир кыһыл көмүс мэтээли Милена Егорова 78 киилэттэн үөһэ ыйааһыҥҥа ылбыта. Алиса Анисимова үрүҥ көмүс мэтээл хаһаайынынан буолла (63 киилэҕэ). Бөлөҕүнэн түһүмэххэ кини иккитэ кыайбыта, ол эрээри финалга Хабаровскай кыраай спортсменыгар хотторбута.
Маны сэргэ иккис миэстэ Назир Картоев (73 киилэҕэ) буолла. Түмүктүүр киирсиигэ кини эмиэ Хабаровскай кыраай спортсменыгар хотторбута.
Боруонса мэтээли Анастасия Попова (57 киилэҕэ), Никита Кулиев (60 киилэҕэ) уонна Кирилл Семиженко (73 киилэҕэ) ыллылар.
