Саха сирин хоккей оскуолатын иитиллээччитэ 19 саастаах Дмитрий Шатайло Череповец куорат «Северсталь» хамаандатын кытта контракт түһэристэ уонна кини Континентальнай Хоккейнай Лигаҕа (КХЛ) оонньуур буолуоҕа. Бу туһунан «Спорт Якутии» иһитиннэрэр.
Дмитрий Шатайло «Эллэй Боотур» хоккей оскуолатын иитиллээччитэ, кинини Владимир Хисамутдинов уонна Леонид Бирюков дьарыктаабыттара. Аҕыйах сыллааҕыта кини Москваҕа көспүтэ, онно Москватааҕы «Спартак» оскуолатын бүтэрбитэ.
Саха сириттэн төрүттээх уол вратарь, ааспыт сезоҥҥа аҕыйах оонньууну Москва таһынааҕы «Атлант» хамаанда састаабыгар оонньообута.
Билигин «Северсталь» хамаандаҕа Дмитрий Шатайло иккис вратарь буолар.
Уопсайа КХЛ-га билигин Саха сириттэн төрүттээх үс хоккеист оонньуур.
