Россия бэрэсидьиэнэ Владимир Путин көҕүлээһининэн «Куттала суох уонна хаачыстыбалаах суоллар» национальнай бырайыак чэрчитинэн суол үлэһиттэрэ Таатта уонна Томпо улуустарыгар 41-тэн тахса килэмиэтир массыына суолун өрөмүөннээн баран үлэҕэ киллэрдилэр. Бу туһунан суол управлениетын пресс-сулууспата иһитиннэрэр.
Суол-тутуу сезона бүтүөр диэри ити оройуоннарга 66-тан тахса км нормативка сөп түбэһиннэриэхтэрэ.
Саха сирин айан суолларын управлениетын генеральнай дириэктэрэ Семен Филиппов этэринэн, Таатта оройуонугар уопсайа 21- тэн тахса килэмиэтир уһуннаах «Харбалаах» уонна «Уолба-Булун-нефтебаза» массыына суолларын учаастактара үлэҕэ киирдилэр.
Томпоҕо «Дьааҥы» суол 26 км икки учаастагар өрөмүөн үлэтин түмүктээбиттэр. Уопсайынан, бу сыл түмүгүнэн, Таатта оройуонугар 32 км, Томпо оройуонугар 34-тэн тахса км массыына суоллара туттарыллыаҕа.
Быйыл 23 массыына суолун эбийиэгэр: 23 «Умнас», «Дьааҥы», «Нам», «Хатас», «Амма», «Анаабыр», «Мүрү», «Бөтүн», «Уолба-Булуҥ», «Харбалаах» уонна «Өлүөхүмэ» өрөмүөн үлэтэ былааннаммыттара бэлиэтэннэ. Уопсайынан суол сезонун бүтүүтэ өрөспүүбүлүкэ уонна муниципальнай суолталаах 221-тэн тахса килэмиэтир усталаах массыына суоллара туттарыллыа.
