Сыл саҕаланыытыттан М.Е. Николаев аатынан Кардиососудистай кииҥҥэ үрдүк технологияны туттан 271 эпэрээссийэни оҥордулар.
«Коронарнай артерияларга сосуд иһигэр ультразвук туттан 188 стентирование оҥордулар. 16 — аортокоронарнай шунтирование, 52 — электрокардиостимулятор имплантацията, тоҕус — нейрохирургическай эпэрээссийэ, алта — сүрэх аритмиятыгар радиочастотнай катетернай абляция. Кардиохирургияҕа ыксаллаах суһал эпэрээссийэлэр 60%-ҥа тэҥнэһэллэр», – диэтэ Кардиососудистай киин дириэктэрэ Күндүл Иванов.
Өрөспүүбүлүкэҕэ 2007 сылы кытта тэҥнээтэххэ үрдүк таһымнаах медицинэ көмөтө 20 төгүл үрдээн турар. Саха сирин медицинэтин баазата саҥардыллан маннык түргэтээн биэрбит. Ол курдук, М.Е. Николаев аатынан Кардиососудистай киин арыллан кардиологияҕа уонна сосудистай неврологияҕа үрдүк технологиялары туттан саҥа эмтэнии ньымаларын киллэрэр кыах баар буолла.
Былырыын Саха сиригэр кардио-нейро уонна рентгенхирургияҕа сүрэххэ уонна сосудтарга 1485 эпэрээссийэни ыыттылар. Ол курдук, аортокоронарнай шунтирование, сүрэххэ кардиостимулятордары уган эндоваскулярнай, хирургическай коррекция, сүрэххэ искэн тахсыытыгар хирургическай эмтээһин, инсульт түгэнигэр мэйиигэ хирургическай эпэрээссийэ уонна да атын.
Ил Дархан өрөспүүбүлүкэ медиктэригэр «Доруобуйа харыстабыла» национальнай бырайыак соруктарын туруорда.
Санатарбыт курдук, дойду бэрэсидьиэнэ Владимир Путин көҕүлээһининэн «Доруобуйа харыстабыла» национальнай бырайыак чэрчитинэн, Айсен Николаев сорудаҕынан, Саха сиригэр үрдүк технология медицинэҕэ киирэр үлэтэ ыытыллар.
