Россия норуоттарын сомоҕолоһууларын сылын уонна Саха сиригэр Култуура сылын саамай суолталаах түгэннэриттэн биирдэстэрэ — Россия бэрэсидьиэнэ Владимир Путин сорудаҕынан тутуллар Василий Босиков аатынан Саха Өрөспүүбүлүкэтин Муусука Үрдүкү оскуолатын саҥа комплексын 2026 сыл ахсынньытыгар үлэҕэ киллэрии буолуоҕа. Үлэ бигэргэтиллибит былаанынан ыытыллар.
Бу туһунан Ил Дархан Айсен Николаев Россия култууратын миниистирэ Ольга Любимованы кытта үлэ көрсүһүүтүн кэмигэр иһитиннэрдэ. Ил Дархан миниистири Дьокуускай куоракка Муусука Үрдүкү оскуолатын саҥа дьиэтин үөрүүлээх арыллыытыгар кыттыыны ыларарга ыҥырда.
Санатан эттэххэ, дойду бэрэсидьиэнэ Владимир Путин 2024–2026 сылларга Саха сирин Муусука Үрдүкү оскуолатын тутуутун түмүктүүргэ уонна үлэҕэ киллэрэргэ, ону таһынан муусука үнүстүрүмүөннэрин атыылаһыыга федеральнай бүддьүөттэн наадалаах үбү сыллата көрөргө сорудахтаабыта. 2024 сыл бэс ыйын 18 күнүгэр Дьокуускайга сырыытын кэмигэр кини оскуолаҕа бэйэтэ сылдьан үөрэнээччилэри кытта көрсүбүтэ.
Муусука Үрдүкү оскуолатын дьиэлэрин комплексын иккис түһүмэҕин тутуу Дьокуускай куорат агломерациятын комплекснай социальнай-экономическай сайдыытын уһун болдьохтоох былааныгар киирбитэ.
9,5 тыһыынча кэриҥэ квадратнай миэтэрэ иэннээх саҥа үс этээстээх комплекс 240 үөрэнээччигэ аналлаах үөрэх корпуһун уонна 150 миэстэлээх интернаты хабар. Теоретическай дисциплиналарга уонна бөлөҕүнэн дьарыктарга аналлаах хостор таһынан, манна улахан кэнсиэр саалата, бибилиэтиэкэ, тыаһы уһулар устуудьуйа, фонотека кабинеттара, ону тэҥэ успуорт саалата баар буолуохтара.
Билиҥҥи туругунан, дьиэ монолитнай каркааһын тутуутун үлэтэ толору түмүктэннэ. Тас истиэнэлэри уонна иһинээҕи истиэнэлэри ууруу үлэтэ түмүктэнэр. Интернат дьиэтин үрдүнэн кырыысаны ууруу (кровля) үлэтэ ыытыллар. Ону кытта сир тупсарыытын үлэтэ барар. Баһаары утарар уонна уу хомуйар иһиттэри туруоруу, септик монтажтааһына түмүктэннэ. Хочуолунай фундаменын ууруу үлэтэ ыытылынна.
Эбийиэк «Дьиэ кэргэн» национальнай бырайыак сыалларын уонна соруктарын толоруоҕа.
Хаартыска: sakha.gov.ru
