Бүтүн Россиятааҕы инновационнай үөрэх технологияларын күрэххэ «Лучший молодой преподаватель высшего образования» анал ааты М.К.Аммосов аатынан ХИФУ Педагогическай институтун «Информатика и вычислительная техника» кафедратын доцена, «Знание» Россиятааҕы уопсастыба лектора Максим Сорочинский ылла.
Күрэххэ тыһыынчаттан тахса эдэр преподаватель, доцен, профессор, кафедра сэбиэдиссэйэ, производственнай үөрэх маастара дойду 85 субъегыттан кытыннылар.
Күрэх икки түһүмэҕинэн ааста. Бастакы түһүмэххэ кыттыылаахтар «Моя профессия – преподаватель» тиэмэҕэ бэйэни билиһиннэрдилэр. Манна үлэлэрин түмүктэрин көрдөрдүлэр. Иккис түһүмэххэ 115 финалист кытынна. Кинилэр аһаҕас уруок ыыттылар, Москва оскуолаларын, колледжтарын, үрдүк үөрэх кыһаларын устудьуоннарын кытта маастар-кылаас ыыттылар.
«Түмүккэ Москватааҕы финансовай-юридическай университет устудьуоннарыгар мин «Нейротехнологии в образовании» диэн тиэмэҕэ маастар-кылаас ыыттым. Биһиги киэҥ билиибит педагог хайысхатын хайдах сайыннарарын кэпсээтим, үлэм түмүктэрин үллэһинним. Төһө да үчүгэйдик кэпсээтэрбин сарсыҥҥы күнүгэр кыайыылаахтары биллэрбиттэригэр бастакы миэстэни ылбыппыттан олус диэн соһуйбутум. Бу мин үлэм-хамнаһым устудьуоннарга, педагогическай уопсастыбаҕа интэриэһинэйин туоһулуур», — диэн Максим Сорочинскай эттэ.
