Саха сирин олохтоохторо Россия бэрэсидьиэнэ Владимир Путин көҕүлээбит национальнай бырайыактарын олоххо киллэрии хаамыытын туһунан сиһилии иһитиннэриини анал порталга киирэн көрүөхтэрин сөп.
Бу туһунан Ил Дархан Айсен Николаев бэйэтин Instagram аккаунугар суруйда.
«Дойду национальнай бырайыактара өрөспүүбүлүкэҕэ иккис сылын олоххо киирэллэр. Ол курдук, «Куттала суох уонна хаачыстыбалаах айан суоллара» национальнай бырайыагынан 2019 сылтан үлэ ыытыллар. 2020 сылга Саха сиригэр уопсайа 180-тан тахса килэмиэтир усталаах региональнай таһымнаах айан суоллара тутуллуохтара уонна 23,5 килэмиэтир усталаах Дьокуускай иһинээҕи суоллар оҥоһуллуохтара», — диэн өрөспүүбүлүкэ баһылыга суруйда.
Саха сирин хас биирдии олохтооҕо өрөспүүбүлүкэ sc.sakha.gov.ru/np порталыгар киирэн бырайыактар олоххо киириилэрин хаамыытын кытта сиһилии билсиэхтэрин сөбүн ыйда.
