Саха сирин олохтоохторо Россия күнүн чэрчитинэн «Тиэргэнинэн бары ыллыыбыт» бүтүн Россиятааҕы дойду гимнин толоруу аахсыйаҕа кыттыстылар.
Биир бастакынан аахсыйаҕа киин куорат «Прометей» оройуонун олохтоохторо кыттыстылар. Кинилэр бэйэлэрин түннүктэрин уонна балконнарын судаарыстыбаннай былааҕынан киэргэттилэр. Биир тиэргэҥҥэ Саха сирин филармониятын артыыстара гимн оонньоотулар уонна бырааһынньыктааҕы эҕэрдэ кэнсиэри көрдөрдүлэр. Маны таһынан, аахсыйа тиэргэн иһинээҕи фонтан үлэтэ саҕаланыытын кытта сөп түбэстэ.
Саха сиригэр Россия күнүн бырааһынньыгын бэлиэтээһин муҥутуур чыпчаалынан киин куорат телебашнята дойду былааҕын өҥнөрүнэн умайыыта буолуоҕа. Икки сүүстэн тахса миэтэрэ үрдүктээх гигант бырааһынньыкка анаммыт өрөгөйдөөх тэрээһиннэри түмүктүөҕэ.
