Мэҥэ Хаҥалас уонна Амма оройуоннааҕы балыыһаларыгар саҥа ИВЛ аппараттара турдулар. Бу күннэргэ экстракорпоральнай мембраннай оксигенация (ЭКМО) аппараттара Саха сирин өрөспүүбүлүкэтээҕи балыыһатыгар кэлэллэрин туһунан бэрэсэдьиэн уонна өрөспүүбүлүкэ бырабыыталыстыбатын пресс-сулууспата иһитиннэрэр.
Санатан эттэххэ, коронавируснай инпиэксийэни утары охсуһарга аналлаах тыҥа искусственнай аппараттарын атыылаһарга «inDriver» уонна «MYTONA» хампаанньалартан «Харысхал» аһымал пуондаҕа 45 мөлүйүөн солкуобай киирбитэ.
«Этиллибит үбү туһанарга пуонда өрөспүүбүлүкэ доруобуйаҕа харыстабылын министиэристибэтин кытта үлэлэстэ. Үлэһиттэр медицинэ анал аппараттарын таларга көмөлөстүлэр. Билиҥҥи туругунан үп 81 % — на туттулунна: анал аппараттар, туттуллар матырыйааллар ылылыннылар», — диэн «Харысхал» пуонда салайааччыта Ольга Захарова билиһиннэрдэ.
Бу суумма 10 тыҥа искусственнай аппараттарын атыылаһарга былааннанна: иккини — Дьокуускайдааҕы клиническэй балыыһаҕа, биирдиини Дьокуускайдааҕы оҕо инфекционнай балыыһатыгар, Амма, Мэҥэ-Хаҥалас, Ньурба улуустарыгар, ону тэҥэ Өлүөхүмэ, Сунтаар, Таатта уонна Чурапчы оройоннааҕы киин балыыһаларыгар. Маны таһынан, ыарыһахха монитор, Дьокуускай куораттааҕы клиническэй балыыһаҕа ЭКМО аппарата, ороскуоттанар матырыйаала атыылаһылынна.
Эпидемия тохтоотоҕуна аппараттар ыарахан туруктаах ыарыһахтарга туттуллуохтара.
