Бүгүн, бэс ыйын 11 күнүгэр, Саха сирин 100 педагогар 100 тыһ солк суумалаах бириэмийэ туттардылар.
Тэрээһин «РНГ» хампаанньа көҕүлээһининэн ыытылынна. Аан бастаан куонкурус Саха АССР үбүлүөйдээх 100 сылын туолбутугар тэриллибитэ. Бу кэнниттэн сыллата ыытыллар буолбута.
Кыттыылаахтар ахсааннара элбээн иһэр. Бу сылга куонкуруска 390 педагог кытынна.
«Педагог илиитигэр оҕолор инники кэскиллэрэ, Россия кэскилэ баар диэн мин элбэхтэ этэн турардаахпын. Бүгүҥҥү күҥҥэ учуутал идэтин оннооҕор биһиги бырамыысалыннаспыт улахан тэрилтэлэрэ өрө туталлар. Ол курдук, «РНГ» хампаанньа номнуо үһүс сылын генеральнай спонсор быһыытынан куонкуруһу өйүүр, холобур буолар. Сыллата өрөспүүбүлүкэ 100 бастыҥ учуутала 100 тыһ солк суумалаах бириэмийэнэн наҕараадаланар», – диэн Ил Дархан Айсен Николаев эттэ.
Куонкуруска чааһынай баспытааталлар уонна биэдэмэстибэ таһынааҕы оскуола иннинээҕи тэрилтэлэр баспытааталлара, искуустуба уонна спорт оҕо оскуолатын учууталлара, оскуола учууталлара уонна орто үөрэх тэрилтэлэрин педагогтара кытталлар.
Бу сылга куонкуруска 36 муниципальнай тэриллииттэн педагогтар кытыннылар. Кинилэр үлэлэрин сыаналыыр көрдөрүүлэри СӨ үөрэҕин уонна билимин министиэристибэтэ оҥорбута. Ол курдук, үөрэнээччилэр олимпиадаларга уонна күрэхтэргэ ситиһиилэрин, үөрэхтэригэр ситиһиилэрин, билимҥэ чинчийиилэрин уонна учуутал бэйэтин ситиһиилэрин көрөллөр.
