13 саастаах саха саахыматчыта Арсений Чумаевский «Moscow Open-2020» норуоттар икки ардыларынааҕы турнирга кыайда. Бу туһунан «Спорт Якутии» иһитиннэрэр.
Быйыл саахымат бэстибээлигэр Россия 76 регионуттан уонна 37 тас дойдуларыттан икки тыһыынчаттан тахса киһи кыттыыны ылла. Саха сириттэн 30-тан тахса спортсмен кыттыбыта бэлиэтэнэр.
«Саахымат гимназиятын үөрэнээччитэ Арсений Чумаевский бастыҥ түмүгү көрдөрдө. 13 саастаах саха саахыматчыта 15 саастарыгар диэри улахан оҕолор бөлөхтөрүгэр бастаата», — диэн гимназия салайааччыта, өрөспүүбүлүкэ сүүмэрдэммит хамаандатын үрдүкү тренерэ Роман Ганжуров эттэ.
Арсений Чумаевский кыаллар тоҕус очукуоттан аҕыһын ылла. Кини бу «Moscow Open» турнирга иккис кыайыыта буолар. Маны таһынан, кини өрөспүүбүлүкэтээҕи уонна Уһук Илиҥҥэ бастыыр иһин күрэхтэһиитин хас да төгүллээх кыайыылааҕа уонна призера. Россия күрэхтэһиилэрин Үрдүкү лигатын кыттыылааҕа уонна Россия үөрэнээччилэрин сайыҥҥы спартакиадатыгар финалга киирбитэ диэн Роман Ганжуров бэлиэтээн эттэ.
