Тохсунньу 23 күнүгэр СӨ Национальнай уус-уран түмэлгэ саахымакка Ил Дархан Кубога эр дьон ортолоругар саҕаланна. Күрэххэ 12 регионтан 58 спортсмен кэлэн кытынна, кинилэр ортолоругар — алта гроссмейстер. Ил Дархан Кубогын бастыҥтан бастыҥнара Россия Кубогар очкуо хомуйан түмүктүүр күрэххэ киирсиэхтэрэ. Күрэх тохсунньу 31 күнүгэр диэри буолуоҕа.
Кубок иккис түһүмэҕин сүрүн дьүүллүүр сүбэтэ — бүтүн Россиятааҕы категориялаах судьуйа, норуоттар икки ардыларынааҕы арбитр, РФ бочуоттах спортивнай судьуйата Михаил Крюков.
«Саха сирин саахыматчыттара уопут ылаллара, атастаһаллара — турнир сүрүн сыала-соруга. Эдэр спортсмеҥҥа хас биирдии киирсээһин улахан дьарык буолар. Онон аатырбыт спортсменнар Саха сиригэр кэлбиттэрэ улахан үөрүүнү аҕалла. Саахымат өрөспүүбүлүкэҕэ өссө да сайда туруо», — диэн Михаил Крюков эттэ.
Ил Дархан Кубогар норуоттар икки ардыларынааҕы таһымнаах гроссмейстердары кытта оонньууллар, күрэхтэһэллэр.
«Атын куораттарга ыытыллар Россия Кубогын түһүмэхтэригэр сылдьар уустук, онон Дьокуускайга буолбутугар олус диэн үөрэбин. Гроссмейстеры кытта оонньуур миэхэ олус улахан уопут буолар», — диэн турнир кыттыылааҕа, Дьокуускай куорат 17 №-дээх орто оскуолатын үөрэнээччитэ Владислав Жирков санаатын үллэһиннэ.
Ил Дархан Кубогын судьуйата Афанасий Павлов иһитиннэрэринэн, бастакы туурга гроссмейстердар утары киирсиигэ Саха сирин саахыматчыттара ситиһиилээхтик оонньообуттар. Ол курдук, саахымакка спорт маастарыгар хандьыдаат Василий Романов норуоттар икки ардыларынааҕы гроссмейстеры Алексей Придорожнайы кыайбыт. Россияҕа кэрэ аҥаардарга чөмпүйүөн Баира Кованова Игорь Протодьяконовка 36 хаамыынан кыайтарбыт.
Ону таһынан ХИФУ устудьуона Никита Находкин гроссмейстер Галина Струтинскайаны кытта 40 хаамыылаах уһун оонньууга тэҥнэспит.
Саха сирин саахыматчыттара бастакы туурга аатырбыт гроссмейстердары кытта киирсэн икки кыайыыны, биир тэҥнэһиини ситистилэр.
Ил Дархан Кубога «Алроса» хампаанньа көҕүлээһининэн ыытыллар. Ону таһынан «Селигдар», «РНГ», «АК «Железные дороги Якутии» кыттыгастаах тэриллэр.
РФ спордун министиэристибэтэ, СӨ физическэй култууратын уонна спордун министиэристибэтэ, Россия саахыматын федерацията, СӨ саахыматын федерацията, СӨ эдэр ыччатын тус сыаллаах пуондата, СӨ дьоҕус наукатын академията уонна СӨ Национальнай уус-уран түмэл күрэх тэрийээчилэринэн бэлиэтэнэллэр.
