«Здравоохранение» национальнай бырайыак чэрчитинэн, өрөспүүбүлүкэтээҕи онкология диспансера саҥа анестезиология ыстаансыйатын ылла. Бу туһунан медицинэ тэрилтэтин Instagram-сирэйигэр иһитиннэрдэ.
«Аҕыйах хонуктааҕыта биһиэхэ аныгы анестезиология ыстаансыйата кэллэ. Маннык кылаастаах оборудование Уһук Илиҥҥи региоҥҥа соҕотох, онон бу сонун сулууспа үлэһиттэрин барыларын үөрдэр», — диэн иһитиннэриигэ этиллэр.
Анестезиология, реанимация уонна интенсивнэй терапия салаатын салайааччыта Тимофей Григорьев бэлиэтииринэн, оборудование экспертнэй кылаастаах саамай аныгы норкуостуур аппарат буолар.
«Маннык аппарааттар көмөлөрүнэн, ИВЛ кэмигэр кыра уларыйыыны, ол курдук тыыныы кээмэйин, баттааһынын хонтуруоллуур кыах баар буолла. Бу барыта монитор графическай ойуутугар көстөр, кыра салгын бэриллэригэр, тыынар уорган сылаас, сииктээх буолар, маны тэҥэ анестетик ороскуота аччыыр», — диэтэ кини.
Билигин быраастар ыарыһах тус уратытын учуоттаан, тыыныы кээмэйин, эбэтэр баттааһынын хонтуруоллуур кыахтаннылар.
«Здравоохранение» национальнай бырайыагынан 2020 сылга диспансер МРТ-аппаратын, гистологическай лаборатория, абдоминальнай эпэрээһийэни оҥорууга эндовидеоскопическай лаборатория, уопсайа 299 мөлүйүөн солкуобай суумалаах ИВЛ аппараттарын ылыаҕа.
