Сэтинньи 10 күнүгэр Биир кэлим координационнай киин чэрчитинэн бааһырбыт байыаннай сулууспалаахтары өйүүр сыалтан өрөспүүбүлүкэттэн быраастар Москваҕа тиийдилэр.
Медицинскэй биригээдэҕэ 2 №-дээх Өрөспүүбүлүкэтээҕи балыыһа быраас-травматолога Анатолий Потапов, клиническай психолог Александр Григорьев уонна 3 №-дээх Дьокуускайдааҕы балыыһа сүрүннүүр бырааһа Светлана Давыдова киирдилэр.
«Биһиги манна өрөспүүбүлүкэ медицинскэй тэрилтэлэрэ бааһырбыт саллааттары эмтииргэ төһө бэлэмнээхтэрин сыаналыыбыт уонна кинилэр реабилитацияны ааһалларыгар наадалаах боротокуоллары, эмтэнии бэрээдэгин бэлэмниибит. Үрдүк таһымнаах соруктары толороругар биһиги медицинабыт бэлэм буолуохтаах. Ону тэҥэ биһиги дойду киин балыыһаларыгар сытар саллааттарбытыгар көмө оҥоруохтаахпыт», — диэн Светлана Давыдова бэлиэтээтэ.
Медиктэр этэллэринэн, төрөөбүт дойдуларыгар төннөн кэлбит СВО кыттыылаахтарын, госпиталларга үлэлиир волонтердар, бааһырбыт саллааттар төрөппүттэриттэн киирбит этиилэри учуоттаан, СӨ доруобуйа харыстабылын министиэристибэтэ Москваҕа сырыы оҥорорго быһаарыы ылыммыт.
Быраастар биригээдэлэрэ маҥнайгы күҥҥэ Мандрыка аатынан Киин байыаннай клиническай госпитальтан эмтэнэн тахсыбыт байыаннай сулууспалаахха консультация ыыппыттар. Салгыы былаан быһыытынан Вишневскай аатынан Киин байыаннай клиническай госпитальга Саха сирин саллааттарын көрсүөхтэрэ. Ону тэҥэ Бурденко аатынан байыаннай госпитальга, Ростов уонна Санкт-Петербург куораттар медицинскэй тэрилтэлэригэр сылдьыахтара.
Саха сирин бааһырбыт саллааттарын кытта үлэ Биир кэлим координациннай киин биир сүрүн хайысхата буолар. Биир кэлим координациннай киин алтынньы 14 күнүгэр Ил Дархан Айсен Николаев быһаарыытынан тэриллибитэ.
