Анал байыаннай дьайыы балаһатыгар Саха сириттэн Ил Дархан бирииһин «Great Wall Poer» массыынаны снайпиҥҥа Уһук Илин чемпионатын кыайыылааҕар, дойдутугар сулууспалыы сылдьар байыаска ыыттылар.
Бу туһунан брифиҥҥэ «Вместе к Победе!» өрөспүүбүлүкэтээҕи хамыыһыйа суһал штабын координационнай киинин бэрэстэбиитэлэ Анна Меркурьева иһитиннэрдэ.
«Ааспыт нэдиэлэҕэ СВО балаһатыгар Аллараа Бэстээхтэн өссө биир улахан массыына үс тиэхиньикэни, гуманитарнай таһаҕаһы тиэйэн айаннаата. Суһал штаб ахсынньы саҕаланыытыгар өссө биир маннык улахан массыынаны ыытары былаанныыр. Байыастарбытыгар гуманитарнай көмө саҥа баартыйатын көхтөөхтүк хомуйа сылдьабыт», – диэн Анна Меркурьева эттэ.
Кини бэлиэтииринэн, Дьокуускайга координационнай киин кыттыылаах III өрөспүүбүлүкэтээҕи «Народ и армия едины» антифашистскай форум буолан ааста.
«Форум чэрчитинэн Илиҥҥи байыаннай уокурук байыаннай-бэлитиическэй үлэҕэ бойобуой бөлөҕүн хамаандыырын солбуйааччы, байыаннай-бэлитиическэй управление салайааччыта, генерал-лейтенант Роман Греков ХИФУ устудьуоннарын, ону тэҥэ улуустарга уонна куораттарга нэһилиэнньэни кытта көрүстэ. Форумҥа суһал штаб көмөтүнэн фронтан Саха сирин 28 байыаһа кэлбитэ. Кинилэргэ форум сүрүн былаһааккатыгар судаарыстыбаннай наҕараадалары туттарбыттара», – диэн спикер эттэ.
Хаартыска: sakha.gov.ru
