Саха сиригэр күн сирин көрбүт хоккеист Андрей Кузьменко Пекиҥҥа ыытыллар XXIV-с кыһыҥҥы олимпиадаҕа кыттар чиэскэ тигистэ.
Андрей Дьокуускайга төрөөбүт. Аҕата хоккей тренерэ, ийэтэ хайыһарынан уонна бэлисипиэт спордунан дьарыктанар.
Уол кыра сааһыттан хоккейы сөбүлээбит. Биэс сааһыгар дьонун кытта Москваҕа көһөн кэлбит. Аҕатын салалтатынан «Белые медведи» хоккей оскуолатыгар дьарыктаммыт. Хоккейга бастакы киирсиитин 16 сааһыгар «Красная Армия» хамаандаҕа эдэрдэр лигаларыгар оонньообут.
Билигин Андрей Санкт-Петербург СКА хамаандатыгар кимэн киирээччинэн оонньуур. Континентальнай хоккейнай лигаҕа 45 киирсиигэ 20 шайбалаах.
Андрей Кузьменконы быйыл Пекиҥҥа ыытыллар XXIV-с кыһыҥҥы олимпиадаҕа Россия сүүмэрдиир хамаандатыгар ыҥырбыттара.
Олунньу 9 күнүгэр Россия хамаандата бастакы киирсиигэ Швейцарияны кытта оонньуур. Быһа эфир олохтоох бириэмэнэн 17:40 саҕаланар.
