От ыйын 23 күнүттэн саҕалаан, Саха сирин соҕуруу өттүгэр заправкалыыр ыстаансыйаларга АИ-95 бэнсиини сууккатааҕы биэрии кээмэйэ үрдүөҕэ. Маннык дьаһалы биэдэмистибэлэр икки ардыларынааҕы хамыыһыйа мунньаҕар СӨ Гражданскай көмүскэлгэ министиэристибэтигэр биэрдилэр. Бу туһунан СӨ Бырабыыталыстыбатын бэрэссэдээтэлэ Кирилл Бычков бэйэтин социальнай ситимигэр иһитиннэрдэ.
«Маныаха массыыналаахтарга табыгастаах буоларын туһугар, өрөспүүбүлүкэҕэ AZS14 диэн QR-куодунан уматыгы түҥэтэр систиэмэ үлэлээтэ. Бу сервиһи СӨ Инновацияҕа министиэристибэтин салалтатынан Өрөспүүбүлүкэтээҕи инфокоммуникационнай технологиялар кииннэрин исписэлиистэрэ оҥордулар. Сервис Дьокуускай куоракка ситиһиилээхтик тургутууну ааста. Систиэмэҕэ от ыйын 21 күнүттэн Алдан куораты холбообуттара. Сервискэ 2 тыһыынчаттан тахса киһи номнуо регистрацияланна», — диэн Кирилл Бычков бэлиэтээтэ.
