Сэтинньи бүтүүтэ Ленскэйгэ тус харыстанар сириэстибэ иккис баартыйатын тиксэриэхтэрэ. Бу туһунан оройуоннааҕы дьаһалта пресс-сулууспата иһитиннэрэр.
Баһылык солбуйааччытын э.т. Евгений Каражеляско этэринэн, оройуоҥҥа уопсайа 700 тыһыынча суумаҕа мааска, бэрчээккэ, антисептик, бахила, биирдэ кэтиллэр харыстыыр көстүүм ылбыттар. Бастакы баартыйа кэлэн ыскылаакка хараллан сытар.
«Бүгүҥҥү туругунан, ыскылаакка иккилии тыһыынча устуука мааска, бэрчээккэ, бахила, 500 экран-мааска, 200 антисептик уонна биирдэ кэтиллэр комбинезоннар кэлэн сыталлар. Сэтинньи бүтүүтэ Ленскэйгэ эбии биэс тыһыынча мааска, түөрт тыһыынча бэрчээккэ уонна бахила кэлиэҕэ. Тиксэрии туһунан хантыраак түһэрсибиппит», — диэтэ кини.
Билиҥҥи туругунан, кэлбит тус харыстанар сириэстибэлэр тыытыллыбаттар, ол эрэн наада буоллаҕына медицина тэрилтэлэригэр, ис дьыала министиэристибэлэригэр уонна да атын федеральнай структураларга тиксэриэхтэрэ. Маны таһынан, саппаас улуус тэрилтэлэригэр, дьаһалта үлэһиттэригэр учуоттанна.
