Россия бырабыыталыстыбатын бэрэссэдээтэлэ — Уһук Илин Россия бэрэсидьиэнин боломуочуйалаах бэрэстэбиитэлэ Юрий Трутнев уонна дойду бэрэсидьиэнин дьаһалтатын бастакы солбуйааччыта Сергей Кириенко Курил Шумшу арыытыгар сырыттылар. Манна Куриллааҕы десантнай операция — ССРС милитаристскай Японияны утары бүтэһик киирсиитин аатыгар түмэл тэриллэрэ былааннанар. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«Бүгүн Иккис Аан дойдутааҕы сэрии түмүктэммит, 1945 сыл атырдьах ыйыгар Куриллааҕы десант уһулуччулаах хорсун быһыытын көрдөрбүт сиригэр сырыттыбыт. Байыастар 4 °C кыраадыс тымныы ууга, икки миэтэрэ дириҥҥэ, күүстээх долгун охсуутугар ыарахан сэбилэниилээх хайдах барытын тулуйбуттарай? Кыайыы 80 сылын көрсө ол историческай көстүүнү сөргүтэн түмэл оҥорору торумнуубут», — диэтэ Сергей Кириенко.
Хаартыска: СӨ бырабыыталыстыбатын уонна баһылыгын дьаһалтатын пресс-сулууспата
