Саха снайпера, Сэбиэскэй сойуус дьоруойа Федор Охлопков туһунан «Сержант без пропаха» диэн ааттаах матырыйаалы pobeda75.lenta.ru сайтка таһаардылар. Бу бырайыагы Lenta.ru федеральнай сайт Улуу Кыайыы 75 сылы көрсө оҥорбута.
«Саха сирин ыраах тайҕатыттан сылдьар булчут Ржев анныгар буолбут алдьархайдаах киирсиигэ кыттыбыт. Сэрии кэннэ аатырбыт снайпер колхуоска үлэлээбит. Онтон сүүрбэ сыл ааспытын кэннэ биирдэ кини туһунан дойду барыта билбит. Генераллар, маршаллар үбүлүөйүнэн эҕэрдэ ыытар буолбуттар», — диэн матырыйаалга суруллар.
Сэбиэскэй сойуус дьоруойа Федор Охлопков 1908 сыллаахха кулун тутар 2 күнүгэр Томпо улууһун Кириэс-Халдьаайытыгар төрөөбүт. Аармыйаҕа 1941 сыллаахха ыҥырыллыбыт. 1-гы Прибалтикатааҕы фронт 43-с аармыйатын 179-с дивизиятын 259-с стрелковай полкатыгар сэриилэспит. Официальнай докумуоннарынан 429 гитлеровскай саллааты уонна апыссыары суох гыммыт. 1968 сыллаахха ыам ыйын 28 күнүгэр өлбүт.
