Корея өрөспүүбүлүкэтигэр Саха сирин култууратын киинэ тутуллара былааннанар. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Өрөспүүбүлүкэ бырабыыталыстыбатын бэрэссэдээтэлин солбуйааччы э.т. Сергей Местников Саха сиригэр Россия-Корея (KORUS Society) бииргэ үлэлиир Уопсастыбатын бэрэссэдээтэлэ Ли Гю Хваны кытта ВКС нөҥүө көрсүһүү ыытта.
«Бииргэ үлэлиир кэммит устатыгар саха култууратын билиһиннэрэ сатыыбыт, ол эрэн, Корея Өрөспүүбүлүкэтигэр Саха сирин туһунан аҕыйаҕы билэллэр. Биһиги дойдубут нэһилиэнньэтэ Саха сирин туһунан билэригэр утары барыыбыт олус улахан суолталаах», — диэтэ Лю Гю Хван.
Корея Өрөспүүбүлүкэтэ корейскай инвестордар суоттарыгар, Сонгдо аан дойдутааҕы дьыалабыай оройуон аттыгар, Инчхон куоракка биэс этээстээх Саха сирин культурнай-информационнай киинин тутары былаанныыр.
«Биһиги бэйэбит өттүбүтүттэн Корея Өрөспүүбүлүкэтигэр Саха сирин киинин тутуллар боппуруоһун өйүүбүт. Бырайыак олоххо киирэригэр Саха сирин историятын, култууратын элимиэннэринэн киин ис тутулун байытарга бэлэммит», — диэтэ Сергей Местников.
Эбийиэк таһын уонна ис өттүн оҥорууга Саха сириттэн бырайыактааччылары уонна дизайнердары кыттыһыннарар , ону тэҥэ, эбийиэк тулалыыр сирин тупсаран оҥорууга сүбэ-ама быһыытынан, эбэтэр кыттыһыы туһунан этии киллэрбиттэрин бэлиэтээтэ.
