Өрөспүүбүлүкэ сорох улуустарыгар быһыыны туруоруу тэтимэ намтаабыта бэлиэтэнэр. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Иһитиннэриини суһал штаб мунньаҕар Ил Дархан Айсен Николаев тириэртэ.
«Ааспыт нэдиэлэҕэ быһыыны туруоруу тэтимэ куһаҕана суох буоллаҕына, бүтэһик күннэргэ эмиэ намтаата. Бу, бастатан туран, вакцина баартыйата өрөспүүбүлүкэҕэ кэмигэр кэлбэт буолбутуттан тутлуктаах», — диэн иһитиннэриигэ этиллэр.
Холобур, Дьокуускайга «ЭпиВакКорона» вакцина эрэ баар, оттон «Спутник V» вакцинаҕа эрдэттэн суруйтарыы ыытыллар. Өрөспүүбүлүкэ үрдүнэн вакцина уопсай кээмэйин 88%-на туттулунна, Дьокуускайга — 95%.
Айсен Николаев быһыыны туруоруу 50%-тан намыһах көрдөрүүлээх улуустарын ааттаталаата — бу Амма, Үөһээ Бүлүү, Нам, Таатта уонна Чурапчы улуустара. Ону тэҥэ, Алдаҥҥа, Ленскэйгэ уонна Миирнэйгэ эмиэ намыһаҕа бэлиэтэнэр.
Вакцина дозатын саппааһа Намҥа, Томпоҕо, Чурапчыга, Хаҥаласка баар.
Ортотунан өрөспүүбүлүкэ үрдүнэн вакцинация тэтимэ былааннаммытыттан 58%-ҥа тэҥ, Дьокуускайга — 62%.
Ил Дархан үөһээ ыйыллыбыт оройуоннарга быһыыны туруоруу тэтимин күүһүрдэргэ сорук туруорда. Ойуур баһаардарын умуруорууга кэлбит баһаарынай тэриллиилэр доруобуйаларын туругун хонтуруоллуурга туспа сорудах бэрилиннэ.
