Ыам ыйын саҕаланыытыгар Саха сиригэр баһаар куттала орто көрдөрүүлээх буолуоҕа. Ол эрээри баһаар сезонун устата Киин, Бүлүү, Арҕаа уонна Соҕуруу бөлөх улуустарга үрдүк таһымҥа тиийэрэ күүтүллэр. Бу туһунан «Авиалесоохрана» иһитиннэрэр.
Билиҥҥи кэмҥэ баһаар кутталлаах сезоҥҥа бэлэмнэнии түмүктэнэн эрэр. СӨ Экологияҕа, айылҕаны туһаныыга уонна ойуур хаһаайыстыбатын министиэристибэтигэр бэлиэтииллэрин курдук, 25 лесничествоҕа анаан ойуур баһаарын умуруорууга былааннар оҥоһуллубуттар уонна бигэргэтиллибиттэр. Ол курдук, суһал умуруорууга 5676 киһи уонна 1779 тиэхиньикэ үлэлиэҕэ.
Ону тэҥэ сиринэн уонна халлаанынан кэтэбил-манабыл хайысхалар бигэргэммиттэр. Авиация 21239 км усталаах хайысханан көрүөҕэ-истиэҕэ. Бу былырыыҥҥыттан 392 км быдан элбэх. Сирдээҕи хайысханан 8535 км патруллуохтара. Баһаар балаһыанньатын мониториҥар сиргэ эбии 32 камераны туттуохтара. Видеокамералары 20 муниципальнай тэриллиигэ туруоруохтара.
Ил Дархан Айсен Николаев уонна РФ бэрэсидьиэнэ Владимир Путин икки ардыларынааҕы сөбүлэҥнэринэн ойууру баһаартан харыстыыр тэрээһиннэргэ үбүлээһин үрдээтэ. Федеральнай бүддьүөттэн көрүллүбүт суума бу сылга 4,3 млрд солк куоһарыа.
Ону таһынан, өрөспүүбүлүкэҕэ биэс саҥа авиационнай салаа баар буолуоҕа. Онтон иккитэ быйыл үлэлэрин номнуо саҕалыа. «Авиалесоохрана» састаабыгар 181 исписэлииһи талбыттар. Кинилэр баар уонна саҥа баар буолуохтаах салааларга үлэлиэхтэрэ.
Баһаар кутталлаах кэмигэр 29 сөмөлүөт уонна икки бөртөлүөт авиапатруллуура былааннанар: 21 Ан-2 сөмөлүөт, Cessna уонна кини курдук типтаах аҕыс чэпчэки мотордаах сөмөлүөт, ону тэҥэ Robinson R-44 икки бөртөлүөт. Баһаардары умуруорууга 21 салгын суудуната туттуллуо: Ми-8 МТВ биэс бөртөлүөт, Ми-8 Т 15 бөртөлүөтэ уонна Ан-24/26 биир сөмөлүөтэ.
Хаартыска: «Авиалесоохрана»
