«Саха сирин тимир суоллара» хампаанньа кыһыҥҥы айан суоллара сабыллыан иннинэ өрөспүүбүлүкэҕэ туһааннаах табаар саппааһын уонна бородууктаны таста. Бу туһунан СӨ тырааныспарын уонна суолун хаһаайыстыбатын пресс-сулууспата иһитиннэрэр.
Ол курдук, болдьоҕун иннинэ Аллараа Бэстээххэ 260-тан тахса вагон кэллэ.
«Уопсай үлэ көмөтүнэн социальнай суолталаах таһаҕаһы Дьокуускайга мууһунан суол сабыллыан иннинэ тастылар», — диэтэ СӨ тырааныспарын уонна суолун хаһаайыстыбатын баһылыга Владимир Сивцев.
Миниистир бэлиэтээбитинэн, табаары тиэйиигэ «АЯМ тутааччыларын ассоциациятын» таһаҕас тиэйэр тырааныспарын туһаннылар. Итиэннэ «Саха сирин тимир суолларын» кытта бииргэ үлэлэһии түмүгэр вагоннар кэлиилэрин сайт нөҥүө кэтиир кыахтаннылар.
Сыл саҕаланыаҕыттан «Беркакит-Томмот-Якутск» тимир суолун салаатынан уопсайа 2,6 мөлүйүөн туонна табаары тастылар. Ол иһигэр «Аллараа Бэстээх» тимир суолунан 471,4 тыһыынча туонна таһаҕас кэллэ. Мантан сиэттэрэн, «Саха сирин тимир суоллара» таһаҕаһы тиэйии кээмэйэ 2021 сылы кытта тэҥнээтэххэ 21 %-нан үрдээбит.
