«СТРАНА» национальнай бириэмийэни сахалар устубут «Узоры жизни» диэн кылгас кээмэйдээх киинэлэрэ кыайда.
«Киинэҕэ олох очурдарын хорсуннук ааһар кырачаан кыыс туһунан көстөр. Сүрүн оруолу Сунтаар оройуонуттан 10 саастаах Мичийэ Чыбыкова оонньообут. Режиссер — сокуоннай саастарын ситэ илик оҕолору реабилитациялыыр социальнай киин стационарнай салаатын сэбиэдиссэйэ Татьяна Егорова. Бириэмийэни киниэхэ биллэр режиссер Егор Кончаловскай туттарда», — диэн үлэ уонна социальнай сайдыы министиэристибэтин пресс-сулууспата иһитиннэрэр.
«СТРАНА» национальнай бириэмийэ — теле-суруналыыстар, режиссердар, оператордар уонна продюсердар бастыҥ үлэлэрин бэлиэтиир, сыл аайы ыытыллар куонкурус. Манна түөрт тыһыынчаттан тахса киһи кыттар.
Бириэмийэни сэттэ анал аакка арааран туттараллар. Санатан эттэххэ, «Саха» национальнай көрдөрөр-иһитиннэрэр хампаанньа генеральнай дириэктэрэ Олег Марков «СТРАНА» бириэмийэ «Идэтигэр бастыҥ» анал аатын ылбыта.
