Саха сиринээҕи суһал штаб COVID-19 инфекциятын туһунан сымыйа сураҕы тарҕатыы иһин административнай уонна холуобунай эппиэтинэс баарын туһунан санатар. Бу туһунан вице-премьер Ольга Балабкина бүгүн, сэтинньи 16 күнүнээҕи брифинг кэмигэр иһитиннэрдэ.
«Өрөспүүбүлүкэтээҕи суһал штаб социальнай ситимнэргэ олохтоохтортон киирэр иһитиннэриилэри кэтээн көрөр уонна хас биирдиилэринэн үлэлиир. Бу өрөбүллэргэ хаттаан сымыйа сурах тарҕанна. Кырдьыга суох иһитннэриини тарҕатыы иһин административнай уонна холуобунай эппиэтинэс баарын уонна ис дьыала министиэристибэтин үлэһиттэрэ маннык иһитиннэриилэри кэтииллэрин санатабын», — диэн кини эттэ.
Саха сиригэр кырдьыга суох иһитиннэриини тарҕатыы иһин административнай эппиэтинэскэ тардыы дьыалалара номнуо тэриллибиттэрэ бэлиэтэнэр.
Санатар буоллахха, өрөспүүбүлүкэтээҕи суһал штаб «коронавирус ыарыыта күүскэ турбутунан сибээстээн олохтоммут хааччахтыыр миэрэлэр ахсынньы 1 күнүттэн түмүктэнэллэр», — диэн социальнай ситимҥэ тарҕаммыт сурах кырдьыга суоҕун туһунан иһитиннэрбитэ.
