Сунтаар улууһун спортивнай олоҕор суолталаах түгэн – буокса спордун сайдыытыгар сүҥкэн кылаатын киллэрбит биллиилээх тренер Анатолий Афанасьев уонна кини талааннаах иитиллээччилэрэ – РФ үтүөлээх маастара Лидия Андреева, норуоттар икки ардыларынааҕы кылаастаах спорт маастара Александр Сидоров ааттарынан өрөспүүбүлүкэтээҕи турнир саҕаланна.
Бу күрэхтэһии Сунтаар буоксатын үгэстэрин салҕыыр, улахан маастардары чиэстиир уонна эдэр көлүөнэни спорка уһуйар сүрүн түһүлгэтэ буолар.
Турнир хаамыыта күүстээх киирсиилэринэн долгутулунна. Быйылгы күрэххэ Ньурба, Бүлүү, Үөһээ Бүлүү улуустарыттан уонна Дьокуускай куораттан барыта 78 саҥа саҕалаан эрэр уонна уопуттаах спортсменнар кэлэн, бэйэлэрин кыахтарын көрдөрдүлэр.
Күрэхтэһии сүрүн соруга – эдэр дьону спортка уһуйуу, чөл олохтоох, бөҕө санаалаах, туруоруммут сыаллаах эдэр көлүөнэни иитии буолар. Турнир кыайыыга дьулуурдаах спортсменнар тахсыыларынан, күүстээх киирсиилэринэн салҕанар.
Күрэс түһүлгэтэ Сунтаар улууһун спортивнай суолугар өссө биир чаҕылхай бэлиэнэн хаалыаҕа.
